Ministri i Jashtëm, Igli Hasani ka mbajtur fjalën e tij në takimin e Këshillit Ministror të OSBE.
Ministri Hasani tha se Rusia është rrezik për sigurinë kolektive të shteteve anëtare të OSBE-së.
“Rreziku më i madh për arkitekturën e sigurisë kolektive përfshirë edhe të shteteve anëtare të OSBE-së është Rusia me agresionin ilegal ndaj Ukrainës. Me veprimet e saj Rusia ka synuar që të dobësojë dhe paralizojë organizatën tonë. Ne dëgjuam të njëjtat fjalë prej tyre sot për paqe si ato në vitin 1956 , 1968, 2008, 2014, 2022 dhe pas kësaj ata na u kundërvunë me tanke. Edhe në Ballkanin Perëndimor pavarësisht përparimit të arritur konfliktet e vjetra mund të rikthehen ndaj OSBE ka një rol të veçantë për të luajtur”, -tha ministri.
Hasani theksoi se Shqipëria po punon për një Ballkan Perëndimor të qëndrueshëm dhe paqësor.
“Ne mbetemi garantues të orientimit evropian të rajonit tonë, i sigurisë, stabilitetit dhe demokracisë. Marrëdhëniet Kosovë-Serbi, nuk ka alternativë tjetër veç dialogut. Mënyra më e mirë për ta bërë Evropën më të sigurt, është njohja e pavarësisë së Kosovës dhe dhënia e vendit që i takon në çdo forum ndërkombëtar”, u shpreh Hasani.
