Muaj maj ka shënuar fluks të lartë të vizitorëve që kanë zgjedhur Shqipërinë për turizëm sipas të dhënave zyrtare. Referuar INSTAT, gjatë muajit maj, rezultojnë të kenë hyrë në territorin e vendit tonë mbi 1.6 milionë shtetas shqiptarë dhe të huaj. Ky tregues ka shënuar rritje me 4,3%, krahasuar me majin e vitit 2024.
Në publikimin e fundit INSTAT nënvizon se vetëm gjatë muajit të kaluar kanë hyrë në territorin shqiptar mbi 987 mijë vizitorë të huaj ose 1,4% më shumë krahasuar me të njëjtën periudhë të vitit 2024. 95% e vizitorëve të huaj janë nga rajoni i Europës, ku ajo Jugore zë 72%, ndjekur nga Evropa Perëndimore me 14% sipas INSTAT.
Hyrjet për pushime zënë 98% të rasteve ku në muajin maj të këtij viti, ky tregues ka shënuar një rritje me 0,9%, krahasuar me majin e 2024. Sipas të dhënave zyrtare në periudhën janar-maj të këtij viti, vendin tonë e kanë vizituar 3.4 milionë turistë të huaj ose 3,9% më shumë krahasuar me të njëjtën periudhë të vitit 2024.
Pritshmeritë e tur-operatorëve mbetën të mëdha veçanërisht gjatë muajve të verës, ku Shqipëria regjistron flukset më të larta turistike. Klan News
