“Krimin e kreva me paramendim në shenjë hakmarrjeje ndaj Arbenit, sepse më lidhi me litar te biznesi i tij”.
Kështu është shprehur para togave të zeza Miran Tila, 43vjeçari, i cili ekzekutoi mbrëmjen e 2 dhjetorit në Manzë biznesmenin Arben Hasa.
Pasditen e 30 nëntorit, Tila thotë se është dhunuar fizikisht nga Arben Hasa. Tila për oficerët e Policisë Gjyqësore ka deklaruar se pasditen e 30 nëntorit, Hasa e ka lidhur me litar te biznesi i tij dhe e kishte torturuar.
Tila ka mbetur shumë i ofenduar dhe planifikoi ekzekutimin e 39 vjeçarit Arben Hasa.
“Arbenin nuk doja ta vrisja, por vetëm ta kërcënoja, pasi dy ditë më parë (30 nëntor) më lidhi me litar te biznesi i tij dhe më dhunoi fizikisht. Më ofendoi shumë rëndë. Kështu vendosa të hakmerresha në njëfarë mënyre dhe planifikova ta kërcënoja me armë zjarri. Pas dy ditësh (02.12.2015, nata e ngjarjes) e kërkova në telefon për të sqaruar muhabetin dhe aty do t’i kërkoja të mos e shikoja më në Manzë, sepse do ta vrisja për ofendimin që më kishte bërë. U takuam, hipëm në makinë për t’u sqaruar.
I thashë: ‘Mos të të shikoj më në Manzë, sepse do të të vras’.
Arbeni nisi të më ofendonte, duke më sharë nga familja. Unë nxora automatikun që mbaja në çantë dhe qëllova drejt tij. Arbeni doli menjëherë nga makina dhe vrapoi 78 metra. Unë u afrova dhe i thashë: ‘Do të vish më në Manzë?!’. ‘Jo, jo’, tha dhe m’u hodh përsipër për të më rrëmbyer armën.
Në këtë moment qëllova. Më pas u largova me automjetin e Arbenit, të cilin e braktisa disa kilometra më tutje, në fshatin Shkallë”, ka deklaruar Miran Tila për oficerët e Policisë Gjyqësore.
Miran Tila, i cili ka pranuar vrasjen e biznesmenit, ka shprehur pendesë përpara togave të zeza, teksa kërkoi mëshirë nga trupi gjykues, që kryesohej nga gjyqtari Rexhep Bekteshi.
“Jam penduar për krimin. Unë nuk doja ta vrisja Arbenin, por vetëm ta kërcënoja, sepse më kishte turpëruar pak ditë më parë. Ai donte të më rrëmbente armën dhe u detyrova të qëlloja sërish mbi të. Më acaroi se më shau nga gruaja dhe motra”, pohoi ndër të tjera Miran Tila para togave të zeza.
Mësohet se Tila dhe autori kishin rreth 8 muaj që njiheshin mes tyre, ndërsa para 4 muajsh kishte lindur konflikti. Pasi dëgjoi të gjitha palët, gjyqtari Rexhep Bekteshi e cilësoi të ligjshëm arrestimin e të pandehurit dhe vendosi si masë sigurie atë të “arrestit në burg”.
Miran Tila e ekzekutoi biznesmenin e drurit nga Maminasi mbrëmjen e 2 dhjetorit. Trupi i pajetë i Arben Hasës u gjet të nesërmen, pasi familja bëri denoncim për largimin e papritur të tij.
Vetëm dëshmia e autorit hedh dritë mbi rrethanat e krimit, pasi familjarët e të dyja palëve kanë treguar se nuk kishin asnjë dijeni për përplasjen mes tyre, pasi në të kundërt do ta kishin parandaluar. (Panorama)
