Orgest Buzi, lojtar i Dinamos në ligën e dytë të futbollit shqiptar, pësoi një ndërhyrje të rëndë në ndeshjen me Shkumbinin në fushën sportive të ekipit të Peqinit. Në minutën e 17-të të ndeshjes lojtari Buzi në një dylyftim me lojtarin Kafazi të Peqinit, mori një shkelm sportiv në hundë, duke pësuar thyerje të rëndë të saj. Menjëherë ai u dërgua në spitalin e Peqinit, por këtu nis tragjikomedia, ku atij iu desh të përballet me një mjek të alkoolizuar.
Ja rrëfimi i plotë i lojtarit Buzi, për atë që i ndodhi në spitalin e Peqinit.
“Pas goditjes që mora në fytyrë nga lojtari kundërshtar, rashë në tokë. Ndërhyrja ishte aq e rëndë sa m’u thye hunda dhe gati sa nuk kam humbur ndjenjat. Më transportojnë me ambulancë për në spital. Sapo shkuam aty, isha përmendur, por hemorragjia dhe dhimbjet nuk pushonin. Mjeku përkatës nuk ndodhej në spital dhe shkuan e thirrën dhe pritëm derisa ai erdhi. Mora një mjekim minimal ku zotëria me bluzë të bardhë vinte era raki dhe bënte kompetentin vetëm me fjalë. Më rekomanduan të nisesha për në Tiranë me urgjencë, por spitali i Peqinit kishte vetëm një ambulancë në dispozicion, atë që më transportoi mua nga stadiumi.
Por, mjeti duhej të rikthehej sërish në stadium, pasi në të kundërt ndërpritej ndeshja. Ishte një moment shumë i vështirë, ku mua m’u desh të kthehesha sërish në stadium për të gjetur mënyrën që të udhëtoja drejt Tiranës.
Nuk kishte as taksi. I kërkuam policisë ndihmë për transport, por nuk na ndihmuan, për shkaqe që nuk i di. Fat që një tifoz i yni doli vullnetar dhe më shoqëroi me makinën e tij nga Peqini drejt spitalit në Tiranë”, tregon Buzi atë që përjetoi në Peqin. (Panoramasport)
