Jerzy Dudek ishte irrituar aq shumë nga mënyra se si Rafa Benitez e kishte trajtuar pas fitimit të Champions League-s sa që kishte konsideruar edhe ‘ta godiste me grusht në fytyrë’ teknikun spanjoll. Portieri polak ishte heroi i mbrëmjes së Stambollit pasi kishte pritur dy 11-metërsha ndaj Milanit duke i dhuruar kështu Kupën e 5-të Kampionëve ekipit anglez. Pavarësisht kësaj arritjeje të polakut, Benitez kishte nënshkruar me Pepe Reina-n nga Villarreal, duke e lënë në stol Dudek në momentin e tij më të mirë tek “të kuqtë”.
“Kisha qenë heroi i Stambollit dhe po shpërblehesha duke qenë zgjedhja e dytë në klub”, – deklaroi Dudek në autobiografinë e tij, “Një Polak i Madh në Portën tonë”. Dudek zbuloi se po atë verë klubi gjerman i Këlnit kishte shprehur interes ndaj tij dhe se ai kishte menduar të pranonte kalimin në Bundesligë pasi aty do të kishte mundësinë të luante si titullar.
Megjithatë transferimi nuk u krye, me Dudek që deklaroi se përfaqësuesit e klubit gjerman kishin kontaktuar me të duke i thënë se Benitez nuk pranonte të bisedonte me ta. Portieri e kishte kaluar më pas debatin edhe në fushën stërvitore: “Isha shumë i irrituar me të, në kokën time kisha një zë që më thoshte: “Godite në fytyrë, godite në fytyrë dhe do të të lërë të shkosh në Gjermani.”
“Për të qenë i sinqertë, me të vërtetë e konsiderova që ta godisja Rafa-n në fytyrë. Por më pas pasojat e një gjesti të tillë më kaluan nëpër mend. A do të më linte të largohesha? Apo thjesht do të shkaktoja një skandal mediatik. Normalisht që s’do luaja më me Liverpool nëse do ta godisja në fytyrë. Të godasësh një trajner të Liverpool-it që sapo kishte fituar Championsin nuk do të dukej mirë në CV-në time, por isha shumë i zemëruar me të.”
