Në fillim shpërthimi, më pas ulërimat dhe më tej terrori: njerëz në arrati por edhe shumë të plagosur dhe gjak kudo. Dëshmitë e atyre që ishin në vendin e sulmeve ose që dhanë ndihmën e parë në Maelbeek dhe në aeroportin e Zaventem rrëfejnë për trupa të shpërndarë kudo, persona të djegur dhe shumë kaos.
Një nga zonjat e sigurisë në aeroport thotë se pa gjak gjithkund.
“Djali im është gjallë, por sot mund të isha edhe unë..”, tregon Larissa që mban në qendër të rrëfimit të saj mbërritjen në Zaventem të të fejuarit Stef, 25, edhe ky i përfshirë në sigurinë e aeroportit.
“Fola më të dhe është mirë. Po punonte në kontrollin e bagazheve dhe pasagjerëve, e njëjta punë me timen. Më tha që kishte dëgjuar dy shpërthime, pak përpara orës 8, në zonën përpara kontrollit të sigurisë.
Kishte gjak gjithandej. Më tha se kishte parë një pushkë të madhe në tokë. Ai menjëherë u fsheh në tualet. Më pas policia dhe ushtria i evakuuan të gjithë drejt portës së daljes në anën e pistës”
Një tjetër dëshmitare thotë: “Isha në pallat, ngjitur me metronë, kur dëgjova një shpërthim të fortë, më pas pashë njerëz të gjakosur të cilët filluan të dilnin nga metroja. Ishte një lum personash dhe disa të plagosur shumë rëndë”
“Duhet të ndalojmë të gjithë në këtë moment dhe të reflektojmë, sepse nuk mundemi më kështu”, thotë Rodolfe Deviller, një punëtor që punonte në një kantier ngjitur me metronë.
