Borshi i Himarës u trondit dy ditë më parë. 53-vjeçari Sokrat Xhuveli vrau me çifte fqinjin e tij 78-vjeçar, Et’hem Brahimaj. Gjatë marrjes në pyetje nga policia e Vlorës, autori i krimit tha se i kishte kërkuar viktimës që të mos e spërkaste rrushin se i helmonte dhitë, por ai jo vetëm nuk e kishte dëgjuar, por edhe e kishte fyer.
Ndërsa, nipi i viktimës, Adriatik Lapaj tha se janë shokuar nga ajo që ndodhi. Ai tregoi se si e gjetën trupin e pajetë të gjyshit të tij.
“Ne jemi 15 nipër e mbesa në atë derë. Gjyshi ishte duke hapur derën për të shkuar në bahçe për të spërkatur rrushin. Në atë moment kishte kaluar afër banesës së tij një vajzë nga lagjja, e cila e kishte pyetur: Çfarë po bën xhaxha Et’hem. Ndërsa gjyshi i ishte përgjigjur: Po ja o bijë, po shkoj të spërkas hardhitë se tani është koha. Kaq i kishte thënë vajzës, e cila kishte vijuar rrugën. Por, pas pak ajo kishte dëgjuar një krismë arme, ndaj ishte kthyer mbrapsht. Vajza e kishte gjetur gjyshin të rrëzuar në tokë dhe të mbuluar me gjak. Ai nuk kishte arritur të hapte derën e bahçes, pasi Sokrat Xhuveli e kish qëlluar nga mbrapa koke. Gjyshi kishte mbetur i vdekur në vend. Dy dhi race kishte Sokrati dhe ato i mbante në shtëpinë e tij, që e kishte afër me atë të gjyshit”, tha nipi i viktimës. Ky i fundit pohoi se janë shokuar nga ajo që ndodhi.
Ndërkaq, banorët e fshatit Borsh pohuan se autori i vrasjes, Sokrat Xhuveli është një person i shpërfillur nga familja, i divorcuar nga bashkëshortja tri vite me parë, ndërsa fëmijët i ka në emigracion.
