Sot është zbardhur ngjarja e Marsit, ku Mirosh Bardhoshi u gjet i vdekur nga goditja e mjeteve të forta në kokë. Policia dhe Prokuroria thonë se autorë janë gruaja dhe dy djemtë e tij. Viktima është gjetur me plagë në kokë të shkaktuara nga goditjet e çekiçit. Sakaq sjellim ne vemendje edhe nje interviste te kunates se viktimes (nusja e vellait). Si e ka mesuar ajo ngjarje? Si u kishte dhene djali? (qe tani rezulton te jete autori).
Kunatat e tij, ka folur për gazetarët një ditë pas ngjarjes (20 Mars 2016). Ja rrëfimi i saj.
Merita, si e mësuat lajmin për vrasjen e kunatit tuaj?
Ne banojmë këtu, i kemi shtëpitë afër njëri-tjetrit. Sot (dje) në mëngjes, rreth orës 6:30, djali i kunatit ka dalë nga shtëpia dhe e ka gjetur të atin të vrarë në rrugicën afër banesës. Nipi na tha se në momentin që gjeti Miroshin, ai mbante një sfurk në dorë. I tronditur nga vrasja e të atit, nipi na lajmëroi ne dhe të afërmit e tjerë si dhe policinë, e cila mbërriti në vendngjarje dhe na mori të gjithëve në pyetje.
Dini gjë nëse kunati juaj kishte konflikte me ndonjë person?
Ne jemi shumë të tronditur nga ajo që ndodhi. Jemi të tmerruar. Kunati im nuk konflikte me asnjë njeri. Nuk e dimë kush e ka bërë vrasjen dhe përse e ka bërë.
Sipas banorëve të fshatit, por edhe policisë, Miroshi konsumonte shumë alkool, pra ishte i alkoolizuar. Ku ka qenë mbrëmjen e së enjtes kunati juaj?
Na thanë që mbrëmjen e së enjtes, Miroshin e kishte thirrur një shok dhe se kishte dalë në Manëz të pinte kafe. Ai ka dalë nga banesa dhe nuk është kthyer mbrëmë (të enjten) në shtëpi.
Me se merrej kunati juaj dhe sa fëmijë ka?
Ai punonte me një karrocë dhe një kalë, merrej me punë bujqësie. Hallexhinj jemi të gjithë. Dy djemtë i ka këtu, ndërsa vajzën e ka në shkollë të lartë në Tiranë. Ajo erdhi sot në mëngjes. Përveç vajzës, tani nuk ka të afërm të tjerë këtu. I mori të gjithë policia dhe janë atje duke u marrë në pyetje. Policia mori në pyetje gruan e kunatit, djemtë, vëllezërit e tij dhe të gjithë kushërinjtë.
Cila është gjendja ekonomike e familjes së kunatit?
Janë fukarenj te zoti. Djali i madh shkon e punon tre muaj në Greqi e më pas kthehet. Me paratë që sjell ai, rrojnë këta të tjerët.
Sa kohë ka qenë kryeplak Miroshi dhe a ka pasur konflikte gjatë kohës që ka pasur këtë detyrë?
Miroshi ka qenë 17 vjet kryeplak i fshatit. Para një muaji ia hoqën këtë detyrë, dhe e ka marrë një tjetër. Asnjëherë nuk ka pasur konflikte me njeri. Nuk ka trokitur kurrë njeri në derë për të. Ka qenë burrë i ndershëm.
Cili është apeli juaj?
Policia të gjejë personat që vranë kunatin tim. Ata që bënë krimin duhet të dënohen!
