Ministrja e Shëndetësisë dhe Mbrojtjes Sociale, Ogerta Manastirliu, ka publikuar një video nga spitali Covid-2 “Shefqet Ndroqi”, ku mjekët dhe infermierët rrëfejnë eksperiencën e tyre gjatë pandemisë.
Manastirliu shkruan se pavarësisht pasigurisë nga e panjohura, rrezikut e frikës për vete dhe familjarët, mjekët, infermierët dhe i gjithë stafi i spitaleve që trajtojnë pacientët me Covid-19 kanë bërë një punë heroike.
Nga ana e tyre stafi i mjekëve dhe infermierëve tregon përballjen në vijën e parë me Covid-19, frikën për infektim dhe mungesën e familjes prej 1 muaj e gjysmë, qëkur Spitali “Shefqet Ndroqi” u bë Spital Covid-2.
“Kemi pritur urgjenca të konfirmuara dhe të pakonfirmuara, gjithsesi i kemi shërbyer pacienteve pa menduar se mund të infektohesha”, thotë kryeinfermierja e spitalit Shefqet Ndroqi, Adelina Dragoti.
“Kur shkoj në shtëpi, shkoj me stres sepse dy vajzat e mia kanë nevojë për mua. Ruhem shumë që të mos i infektoj”, u shpreh kryeinfermierja e shërbimit të pneumologjisë, Lediana Hida.
“Ishte shumë e vështirë sepse ishte hera e parë që ndodheshim në këtë situatë”, thotë infermieri i urgjencës, Sofokli Hoxha.
“Momenti i parë kishte disa elementë të tjerë brenda. Kishte pjesën e ankthit, të stresit nga infektimi i covid, ishte edhe vetë diagnoza, ishte hera e parë që ndesheshim me këtë patologji”, u shpreh Shef i shërbimit të imazherisë në këtë spital Dr. Pëllumb Hysko.
“Familjen nuk e kam parë që prej 1 muaj e gjysmë, që kur spitali ynë u shpall Covid 2. Normalisht flasim nëpërmjet skype, por kontaktin e kemi evituar plotësisht”, tha mjekja pneumologe, Irma Tashi./Opinion.al
https://www.facebook.com/OgertaManastirliu/videos/848871365589813/
