I ftuar në rubrikën “Në makinë me këngët e…” pjesë e emisionit “Vizioni i Pasdites”, producenti Petri Bozo ka rrëfyer fillesat e karrierës së tij, por edhe pjesë të jetës personale përmes këngëve të tij të preferuara.
Në pyetjen e bërë nga moderatorja dhe autorja e programit Orinda Huta mbi firmat piramidale të viteve ’90, Petri ka pohuar se ka humbur 5 milionë lekë të vjetra në këto firma. “Unë humba një shumë 5 milion lekë të vjetra, në fakt është një komedi e madhe. I kisha marrë nga një dokumentar i bërë për firmën “Kamberi” në Vlorë dhe nuk i mora me vete në Tiranë, po i dorëzova tek firma “Gjallica”, pra i mora në një derë dhe i futa në një tjetër. Nuk e dija që ajo punë që kisha bërë vlerësohej aq i thashë të më jepte sa të donte. Kur më dha 5 milionë mu dukën shumë lekë dhe thashë “me gjithë këto lekë të kthehem në Tiranë?”, kështu i lashë tek tjetri dhe i humba”deklaroi Petri Bozo.
