Poeti dhe autori i mirënjohur Agim Doçi, ka rrëfyer një detaj të veçantë për Festivalin e 27të të Këngës në RTSH, e më konkretisht për fustanin që Parashqevi Simaku mbante veshur.
I ftuar në emisionin “Pasdite në Top Channel” bashkë me Pirro Çakon, Doçi ka rrëfyer se atë edicion Parashqevia, e cila konkurronte me këngën “e Duam Lumturinë”, kishte kërkuar me patjetër që të vishte një fustan taftaje me ngjyrë rozë, e për t’ia mundësuar këtë atij ju desh të vidhte perdet e Komitetit Qendror.
“I vetmi vend ku mund ta gjeja ishte Komiteti Qendror. Perdet e Komitetit Qendror ishin bojë rozë. I kam vjedhur dhe me copën në dorë kam shkuar tek rrobaqepësja më e mirë e artistëve, Shpresa Zeraliu, të cilës sa nuk i ra pika kur m’i pa në dorë, sepse i njohu që ishin perdet e Komitet”, ka rrëfyer Doçi.
Ndërkohë nga ana tjetër Pirro Çako ka treguar se si këngëtarja hoqi dorë nga kënga pasi nuk i pëlqeu orkestrimi. “Parashqevia hoqi dorë nga kënga. Iku sepse nuk i pëlqeu orkestrimi. Të pasnesërmen ishte festivali. Gjergj Lekën ishte i vetmi që pranoi ta riorkestronte këngën për gjatë gjithë natës”, rrëfen Pirro. Vetëm pasi siguroi fustanin me tafta rozë dhe u bind për orkestrimin, Parashqevia pranoi të këndonte këngën, që fitoi çmimin e parë në atë festival.
