“Na kapën në befasi dhe na u drejtuan me fjalët Policia e Shtetit, kishin dhe uniformë ndaj nuk reaguam me armë”.
Ka qenë kjo përgjigja e dhënë para grupit hetimor e 6 rojeve private të “Rogat Security” të ndaluar pas grabitjes së 3.8 milion eurove një ditë më parë në aksin Tiranë-Rinas.
“Rogat Security” që po i transportonte me thasë nga Tirana drejt Rinasit. Kjo shifër tashmë konfirmohet për Shqiptarja.com nga Prokuroria e Tiranës që po heton këtë rastin.
Por si ndodhi kjo grabitje dhe çfarë kanë deklaruar 6 punonjësit e policisë private?
Në deklarimet e tyre përballë prokurorit Olsi Dado ata kanë rrëfyer se një automjet tip fuoristradë i ka ndërprerë rrugën duke detyruar blindin të bëjë një frenim të fortë.
Makina blind ishte e para në autokolonë, ndërsa pas kishte eskortën e policisë private.
Në këtë çast sipas rojeve private ata kanë reaguar duke dalë nga makina dhe menjëherë kanë rënë pre e sulmit nga persona të veshur me uniformë policie e të maskuar të cilët i kanë goditur ata me mjete të forta dhe kanë mundur që njërit prej rojeve t’i marrin dhe armën automatik kallashnikov.
Me këtë armë – kanë shpjeguar policët privatë – ata kanë qëlluar në ajër duke na kërkuar të shtriheshin në tokë, me fjalët policia e shtetit duart lart”.
Më pas – sipas deklarimeve të rojeve private – grabitësit kanë hapur derën në të djathtë të blindit duke marrë 4 thasët me para dhe janë larguar në pak minuta nëpërmjet rrugës dytësore.
Sipas dëshmive targa e fuoristradës e përdorur në grabitje ishte TR 8801 E, targë e cila nga verifikimet e hetuesve rezulton e çregjistruar dhe pa pronar.
Të pyetur se përse nuk kanë reaguar me armën e shërbimit përballë kësaj situate, rojet mësohet se kanë deklaruar në të njëjtin version.
“Na kapën në befasi ishte në pak sekonda çdo veprim, ata ishin veshur si polic kishin dhe fenelina dhe na u drejtuan duart lart Policia e Shtetit”.
Të gjashtë rojet e arrestuar Artan Mane, Eduart Metollari, Niko Prifti, Agron Lloha, Agron Ademi dhe Alban Sharra të shtunën do të dalin para Gjykatës së Tiranës për tu njohur me masën e sigurisë dhe akuzën e shpërdorimit të detyrës. (Shqiptarja.com)
