Çështjet “Rraja” dhe “Ahmetaj” kanë nxitur debate mes opozitës dhe mazhorancës në komisionin e ligjeve teksa po diskutonin propozimet e tyre për ligjin e Iustracionit.
Kjo ka ardhur pasi SPAK kërkoi arrestimin e ish-zëvendës kryeministrit Arben Ahmetajt dhe familjarët e deputetit Rrahman Rraja janë në kërkim për dhunën e ushtruar ndaj dy personave.
Deputeti socialist Toni Gogu i kujtoi demokratëve lidhjet me ish-sigurimin e shtetit përmes ish-kryeministrit Berisha dhe aleatit të tij Ilir Meta, i dyshuar si spiun i regjimit, por përgjigjen e mori nga Enkelejd Alibeaj i cili i kujtoi dy ngjarjet e fundit që tronditën jo pak socialistët.
Në replikë, Toni Gogu shpjegoi qëndrimin e socialistëve për dy ngjarjet e fundit, çështjen “Rraja” dhe “Ahmetaj”.
Ndërsa deputeti tjetër i Partisë Demokratike, Gazment Bardhi, kërkoi që kuvendi t’i japë menjëherë autorizimin SPAK për arrestimin e ish-zv.kryeministrit Arben Ahmetaj.
“Pse ndryshuat qëndrim ju apo e kuptuat që nuk mund të merrnit më shumë vota se një ish-sekretar partie dhe se një i dyshuar për spiun”, tha Gogu.
“Këto diversionet që bën ti, janë fiks si të Sigurimit të Shtetit”, deklaroi Oerd Bylykbashi.
“Me çfarë morali flet t’i që je kolegu i Rrahman Rrajës që e di gjithë bota se çfarë bënë. Që je kolegu i Ahmetajt”, u shpreh Alibeaj.
“Unë besoj se ka vendosur një standard që ne të dy si prind, duhet ta vëzhgojmë dhe ta respektojmë. Për sa i përket Ahmetajt, ky është një standard i vjetër me ligjin. Ne të gjithë jemi të barabartë para ligjit”, tha Gogu.
“Ne shkojmë në prokurori, por si kallëzues dhe nga kallëzimet që kemi bërë ne është krijuar një grup parlamentar në burg”, u shpreh Gazment Bardhi.
Pas akuzave të opozitës, debatet vijuan me tone të larta dhe detyruan kryetaren e komisionit të ndërpriste përkohësisht mbledhjen.
