Ish-drejtuesja e Sektorit të Dekriminalizimit në Prokurorinë e Përgjithshme, Rovena Gashi, e shkarkuar nga shkalla e parë e vettingut, ka dalë sot përpara trupës gjykuese të Kolegjit të Posaçëm të Apelimit me kërkesën për t’u rikthyer në detyrë.
Ajo u asistua në këtë proces nga Ema Gashi, motra e saj, njëkohësisht gjyqtare në Durrës. Vëzhgues nga Operacioni Ndërkombëtar i Monitorimit është Theo Jacobs, që zëvendëson Mia Rosing. Kjo gjë ka nxitur kundërshtimin e motrës së Rovena Gashit. “Nuk jemi njoftuar që do ishte ky vëzhguesi ndërkombëtar i ONM (Theo Jacobs) që do merrte sot pjesë në këtë seancë”, ka thënë Ema Gashi.
Pasi u tërhoq për të marrë vendimin, trupa gjykuese ka rrëzuar kërkesën e Rovena Gashit për t’u asistuar nga motra e saj dhe e ka shtyrë seancën për datën 23 prill. “Nëse zonja Gashi e vlerëson të nevojshme, të zgjedhë një avokat për t’u asistuar në këtë proces”, ka thënë gjyqtarja.
E njohur ndryshe si ish krahu i djathtë i Adriatik Lallës, Rovena Gashi e ka filluar karrierën në Prokurori në vitin 2004. Ajo ka punuar si prokurore në Tiranë nga viti 2004 deri në vitin 2013, kur u emërua në krye të Drejtorisë së Marrëdhënieve Juridiksionale me Jashtë në Prokurorinë e Përgjithshme.
Gashi e mbajti këtë detyrë deri në fund të dhjetorit 2017, kur kryeprokurorja e re Arta Marku e uli në detyrë. Ndërsa në maj 2018, Prokuroria regjistroi procedimin penal ndaj saj dhe bashkëshortit Dritan Gina, të cilët po hetohen për pasurinë e tyre, ndërkohë që Marku i pezulloi të dy nga detyra./Opinion.al
