Cristiano Ronaldo shpreson se do të ketë surpriza të tjerë në “Euro 2016” për Portugalinë, duke nisur nga përplasja e radhës me Kroacinë. Ylli i Real Madridit kaloi një fazë të përzierë në grup, teksa kombëtarja e tij përfundoi e treta, pas Hungarisë dhe Islandës. Në momentin kur luzitanët u përballën me eliminimin në ndeshjen e tretë të Grupit F, Ronaldo, në fund të fundit, bëri diferencën me dy gola dhe një asist gjatë barazimit të rrëmujshëm 3-3 me Hungarinë, i mjaftueshëm për të përparuar më tej si një nga ekipet më të mira të vendeve të treta. Por, kësi surprizash nuk do të përfundojnë, sipas Ronaldos.
“Unë nuk mendoj se ka shumë surpriza në futbollin europian. Ndoshta në fazën e grupeve mund të ketë ndonjë surprizë, por vendet e mëdha gjithmonë arrijnë në finale”, – tha ai për “Times of India”. Ndërsa rruga e të tijve drejt 16-shes së Europianit nuk ishte fort e mirë, kualifikimi erdhi përmes 3 barazimeve, portugezët dhe ylli i tyre besojnë se janë në gjendje për ta kapërcyer Kroacinë.
“Ne do të përballemi me një ekip shumë të mirë dhe shanset janë 50-50. I pamë pikat kryesore të lojës së kroatëve në ndeshjen e tyre të fundit, kundër Spanjës. Ata janë një kundërshtar i vështirë, – shton Ronaldo.
Jo çdo ekip arrin ta mundë Spanjën, por e dimë vlerën tonë dhe do t’i shikojmë në sy kroatët, kur të përballemi me ta. Do të jemi plotësisht gati. Unë mendoj se Portugala është mjaft e mirë për të sfiduar këdo. Kemi në përbërje lojtarë të mëdhenj, që luajnë në ligat më të mira në botë. Pra, pse jo? Tani duhet të qëndrojnë së bashku në fushë dhe shpresoj që fati të jetë me ne. E përsëris, kemi lojtarë të mirë, një trajner të mirë si Fernando Santos dhe duhet të besojmë në veten tonë.
Endrra ime personale është për të fituar një trofe të madh me vendin tim. Ka një shans që mund të ndodhë kësaj here në Francë, por është e komplikuar, e vështirë. Ne jemi duke dhënë çdo gjë. Kam fituar shumë trofe të mëdhenj në karrierën time, më të mëdhenjtë që mund të fitosh, por një titull me vendin tim është gjithmonë i rëndësishëm. Kjo është një ëndërr e madhe për ta përmbushur.”
