Ish-trajneri i Real Madrid, Carlo Ancelotti, që sezonin e ardhshëm do të ulet në stolin e Bayern Mynih, ka folur sot për rivalitetin mes dy yjeve të futbollit të sotëm, portugezit Cristiano Ronaldo dhe argjentinasit Lionel Messi. Sipas trajnerit italian, dy futbollistët kanë nevojë për njëri-tjetrin, pasi ky rivalitet i ka bërë ata më të mirë. Për më shumë se një dekadë ata të dy kanë dueluar mes tyre në fushë për të marrë trofetë më të rëndësishëm në futboll, si në rang ekipor ashtu dhe atë personal
Ancelotti, që ka udhëhequr Real Madrid drejt triumfeve në Spanjë dhe Europë, duke trajnuar edhe sulmuesin portugez për dy sezone, shprehet se ky rivalitet ka ndihmuar të dy sportistët për të qenë më të motivuar. “Gjithnjë më kanë pyetur se kush është më i miri apo se çfarë mendon Ronaldo për Messin. Unë mund të them se nuk kemi kaluar kurrë kohën duke biseduar për Messin. Ajo që mund të them është se Cristiano e respekton Messin, madje e vlerëson shumë. Ndaj unë mendoj se ata kanë nevojë për njëri-tjetrin”, deklaroi Ancelotti për mediat.
Më tej, trajneri Carlo Ancelotti shton: “Secili e “godet” tjetrin, për të arritur nivele të tjera, më të larta, për të arritur rekorde të reja dhe shënuar sa më shumë. Ronaldon e njoh mirë. Ka nënshkruar me Manchester United në vitin 2003 dhe sot, pas 13 vitesh, është ende lojtari më i mirë i Europës. Kjo është e pabesueshme dhe ka qenë një nder për mua ta stërvis”, u shpreh trajneri italian, që pas aventurës në vendlindje, Francës, Angli e Spanjë, kudo fitues, tani do të kërkojë të triumfojë edhe në Bundesliga me skuadrën kampione të Bayern Mynih.
