Kryetari i Partisë Demokratike, Lulzim Basha deklaroi një ditë më parë jashtë sallës së Parlamentit se në bashkëpunim me partnerët ndërkombëtarë ka arritur që të bindë palën tjetër pra, Partinë Socialiste për ringritjen e Komisionit Bipartizan të Reformës Zgjedhore.
Pas deklaratës së tij, ditën e sotme janë pyetur nga mediat ambasada e SHBA dhe e BE se për çfarë ndihme fliste Lulzim Basha. Ndërkohë që zyrtarisht këto Ambasada hodhën poshtë përfshirjen në këtë proces, por kanë bërë thirrje që kjo reformë të realizohet me konsensus.
Ndërkaq pas reagimeve të delegacionit të BE, ambasadës britanike dhe asaj të SHBA, reagoi kreu i PD Lulzim Basha i cili shprehu mirënjohjen për mbështetjen që partnerët strategjikë të Shqipërisë, SHBA, BE, Britania si edhe OSBE-ODIHR i japin procesit të reformës zgjedhore në Shqipëri. Sipas tij, falë kësaj mbështetje, pas një periudhe të gjatë heshtjeje, Komisioni për Reformën Zgjedhore pritet të nisë punën së shpejti.
Basha nuk bëri asnjë reagim për deklaratat e misioneve të huaja diplomatike në Shqipëri të cilat komentuan mbi deklaratat e tij, por reagoi nëpërmjet zëdhënëses. Kjo e fundit i cilësoi lajmet e transmetuar anë media si aludime.
Ajo saktëson se Lulzim Basha falënderoi për bashkëpunimin partnerët ndërkombëtarë për rinisjen e punës së Reformës Zgjedhore.
