Traditat e Krishtlindjeve në Bogë kanë një ritual të veçantë. Gëzim Olaj, mikpritësi i programit “Shije Shtëpie” në Tv Klan tregon se kjo krahinë i përket besimit katolik dhe përgatitjet për Krishtlindje nisi thuajse një muaj më parë.
Deri në ditën e Krishtlindjeve nuk lejohej që të jepej vajza për martesë dhe kjo periudhë quhej “mot i lidhur”. Gjatë kësaj kohe, njerëzit luteshin dhe agjëronin deri në mesnatën e vigjiljes së Krishtlindjeve.
Një tjetër zakon lidhej edhe me barinjtë që nxirrnin bagëtinë në mal dhe nuk konsumonin asgjë, por vetëm mbanin një guralec në gojë.
Gëzim Olaj: Përgatitjet për Krishtlindje kanë filluar që një muaj e ca përpara. Ka ardhur një festë, quhet festa e Shën Kollit, Nikolasi që është më datë 5 dhjetor nata e me 6 dita. Atëherë variojnë dhe vijnë edhe Krishtlindjet, kemi filluar përgatitjet për Krishtlindje. Ka qenë një zakon që e kemi patur edhe në zonë, atëherë nuk është lejuar të jepje dorën e asnjë vajze, t’i jepje fjalën dikujt në një shkuesi, të martoje një vajzë a të fejoje dikë, të bëje diçka, një veprim. Nuk lejohet të thoje as po, as jo, as të bëje ndonjë veprim që bashkonte një çift, një familje, asgjë nuk lejohej deri ditën e Krishtlindjeve, deri në dtaën 25. Aty lirohej çdo gjë, aty janë dhënë fjalët, janë lidhur martesat, aty është krijuar gjithçka. Një muaj ka qenë ai muaji, i themi ne moti i lidhur, s’kemi bërë shumë gjëra se ka qenë moti i lidhur, s’është lejuar.
Ato kanë qenë kohë me lutje, duke pritur Krishtlindjen. Ditën e Krishtlindjeve, sot bëjnë sikur mbajnë “thatë” i themi ne, por atëherë kanë mbajtur shumë “thatë”. Atëherë s’hanin as bukë, as kanë pirë ujë, nuk e kanë bërë meshën që është drekë, e kanë bërë meshën në 12 të natës kur ka lindur Krishti dhe mbrapa ka filluar celebrimi, mbrapa kanë filluar të hanë, kemi patur bagëtinë që e kemi therur, tërë gjërat që kemi filluar t’i festojmë, atëherë ka filluar atmosfera festive, nga data 24 e prapa.
Kemi patur edhe një gjë krejt të veçantë, barinjtë që shkonin me bagëti në mal, në datën 24 kishin një zakon, merrnin një gur të vogël, e mbanin në gojë tërë ditën dhe nuk hanin, kjo i bënte edhe mos të hanin bukë dhe tërë lutjet e këtij guri ishin që ujku të mos hante bagëtitë për 12 muajt e ardhshëm./tvklan.al
