Gara e tij zyrtare në Lojrat Olimpike përfundoi më 6 gusht, por çiklisti kosovar Qëndrim Guri preferoi të qëndronte në Rio de Zhaneiro.
Por ky vendim i rrezikoi seriozisht jetën, pasi ai u aksidentua teksa përgatitej me biçikletën e tij në një prej rrugëve kryesore të Rios.
Mediat lokale bënë të ditur se sportisti kosovar u godit nga një makinë në autostradën “Avenida das Americas”.
Ai u dërgua në spitalin më të afërt ku mori ndihmën e parë dhe gjendja e tij është e qëndrueshme.
Por kjo ngjarje e rëndë ka shkaktuar polemika. “Daily Mail” shkruan se për të marrë ndihmën e parë çiklisti priti më shumë se 40 minuta mbërritjen e ambulancës.
