Anëtari i Komisionit të Ankimimeve dhe Sanksioneve, Koli Bele, ishte i ftuar këtë të premte (27 qershor) në Klan News, ku sqaroi procesin e rinumërimit të votave në Tiranë.
“Fleta e Tiranës në këto zgjedhje ka qenë pak si e pazakontë dhe shumë komplekse. Parimi i mbajtur nga KAS ka qenë identifikimi i votës në kuti apo në trupin e kandidatit. Dikush mund ta ketë rrethuar, dikush mund të ketë vendosur “x”. Pra variablet janë të pafundme. Ka pasur raste kur personi ka vendosur “x” në kutinë e identifikuar dhe ka vënë edhe një x jashtë. Ka pasur një keqkuptim në media, besoj dhe nga kandidatët. Këto fletë nuk janë quajtur të pavlefshme, janë quajtur të vlefshme, por personat shohin në ekran, dëgjojnë disa tituj dhe keqkuptohen”, tha Bele gjatë intervistës me gazetarin Besard Jacaj.
Sipas tij, ka një shpjegim logjik të asaj që ka ndodhur. Së pari foli për lëvizje të votave për kandidatët që kanë pasur shumë vota. Theksoi se në zona të caktuara ka pasur lëvizje të papërfillshme. Nuk mohoi edhe rastin e ndonjë komisioneri që është mundur ta interpretojë votën në mënyrë favorizuese. Megjithatë, Bele sqaroi se nuk bëhet fjalë për lëvizje, trafikim apo ndërhyrje në rezultat.
“Nuk është rastësi që rezultatet nuk lëvizën dhe nëse i shikojmë në raportet e kandidatëve ka një shpjegim logjik të asaj që ka ndodhur. Pra, ka lëvizje të votave në kandidatë që kanë pasur shumë vota. Ka në zona të caktuara ndonjë lëvizje më shumë ose më pak. Nuk e përjashtoj dot rastin e ndonjë komisioneri me protagonizëm që është munduar ta interpretojë në mënyrë favorizuese, por bëhet fjalë për fenomene minore, dhe nuk bëhet fjalë për lëvizje, për trafikim apo ndërhyrje në rezultat”, tha ai.
Sipas anëtarit të KAS, procesi zgjedhor në Shqipëri, që nga votimi e deri te numërimi ka garanci, që Bele tha se nuk i ka “parë në vende të tjera”.
“Identifikimin e zgjedhësit, në procesin e numërimit, në mënyrën transparente që bëhet para kamerave, në procesin e ankimit. Pra është një procedurë që duhej të thjeshtohej, jo më të garantohej më me garanci të tjera”, theksoi ai.
Sipas Beles, procesi i rinumërimit në Durrës dhe Fier mund të zgjasë disa ditë. Ai theksoi se shpreson që procesi të mbyllet përfundimisht në 10-ditëshin e korrikut për të pasur në këtë mënyrë edhe rezultatin përfundimtar nga Komisioni Qendror i Zgjedhjeve.
Kujtojmë se nga rinumërimi i votave për Qarkun e Tiranës nuk pasoi asnjë ndryshim mandatesh si për subjektet ashtu edhe për kandidatët.
Dy forcat e mëdha janë ato që pas 10 ditësh rinumërim rezultojnë të kenë marrë më shumë vota sesa ka qenë vullneti i shprehur i zgjedhësve.
Saktësisht, Partia Demokratike, që ishte dhe iniciatorja e procesit të rinumërimit, ka marrë 612 vota të pamerituara, edhe socialistët 380./tvklan.al
