Nëse shqiptarët nuk do të punojnë në kantierët e rindërtimit atëherë vendet do t’i zënë punëtorë të huaj. Kjo është sinteza e asaj që tha kryeministri Rama sot në seancën pleanre të Kuvendit.
Rama njoftoi se të gjithë punëtorët që do të punojnë për rindërtimin e objekteve të dëmtuara nga tërmeti i 26 nëntorit do të paguhen me rrogën mesatare 420 euro. Por ai shtoi se nëse vendet nuk plotësohen atëherë kufijtë do të jenë të hapur për shtetas të huaj.
“Ne do të hapim kufijtë edhe për punonjësit e huaj, do t’i japim mundësi kompanive që të rekrutojnë punonjës të huaj për të ardhur për të punuar në Shqipëri në rast se kjo do të jetë e nevojshme si pasojë e vendeve të punës që nuk plotësohen me punonjës vendas. Në këtë sfidë ne kemi mundësinë që me avantazhin e krijuar me një procedurë të lehtësuar prej 7 ditësh, të kemi punonjës nga jashtë për të gjithë sektorët që vuajnë shumë për mungesë të krahut të punës si pasojë e refuzimit të shumëkujt për të punuar në sektorin privat në pritje të një pune në shtet”, u shpreh Kryeministri Edi Rama.
Ai tha gjithashtu se për vendet e punës në administratën shtetërore kanë përparësi studentët ekselentë ose ata që kanë ekesperienca të suksesshme të tjera.
Rama foli gjithashtu edhe për koronavirusin ku i bëri thirrje qytetarëve “të mos rendin pas maskave” dhe të mos bien pre e asaj që ai e quajti “infodemi”.
Thirrja që bën OBSH, mos rendni për të blerë maska, mos harxhoni lekë për maska, maskat nuk mbrojnë personat nga prekja. Maskat, janë të dobishme për personelin mjekësor, janë të dobishme për të prekurit dhe ata që u shërbejnë të prekurve. Të tjerëve nuk i mbrojnë dhe nuk i bëjnë asgjë Gjithë histeria për të blerë maska dhe për tu maskuar harxhim i kotë parash… Mos u alarmoni nga infodemia, qëndroni larg lajmeve dhe informacioneve jozyrtare dhe vendosni maskë në vetëdije për të përballuar rezultatet e klikimeve kuturu nëpër portale që flasin vetëm për vdekje dhe fundin e botës. Statistika e deritanishme mbi personat që për fat të keq kanë humbur jetën tregon se koronavirusi prek më të moshuarit fare në mënyrë më kërcënuese për jetën, prek të sëmurët dhe deri më tani është kapërcyer nga fëmijët dhe personat e shëndetshëm”, tha Rama. /Opinion.al
