Të enjten, 1 dhjetor, në orën 18:00, në stadiumin “Selman Stermasi”, pasi u luajt për herë të parë jashtë kryeqytetit (Elbasan Arena”), në fazën e parë, do të luhet derbi i 147-të midis Tiranës dhe Partizanit. Ky ballafaqim është i inkuadruar në kuadrin e javës së 13-të të kampionatit të 78-të kombëtar, Kategoria Superiore, teksa kreu mbahet nga Skënderbeu, me 26 pikë. “Demat e kuq” janë 3 pikë pas korçarëve, në vendin e tretë, ndërsa bardheblutë kanë 21 pikë dhe renditet të katërtit. Të dyja skuadrat kanë ndryshuar trajner rrugës, teksa ka ikur Ilir Daja dhe ka ardhur Mirel Josa te 24 herë kampionët, ndërsa Starova ka zënë vendin e Sormanit te “demat”. Objektivat e naltuara nga të dyja palët shkojnë në të njëjtin drejtim, sikurse e kërkon dhe emri i dy klubeve kryeytetase, por më hapur për titullin kanë dalë të kuqtë. Tirana, nga ana e saj, ka vënë si “kufi” jo më pak se arritjen në Kupat e Europës, ndryshe përsëritet dështimi.
Pavarësisht pikësynimeve të skuadrave në fjalë, në të tilla përplasje vlen më shumë shprehja: “Le të mos e fitojmë titullin, mjafton të fitojmë ndeshjet derbi”. Bardheblutë janë jo pak defiçitarë në këtë drejtim, sepse nuk fitojnë ndaj 15 herë kampionëve në 10 derbet e fundit radhazi. Pra, antagonizmi mbetet në shkallën sipërore. Sa i përket historisë së këtyre përplasjeve, deri tani janë luajtur 146 ndeshje në total. Partizani ka 60 fitore, Tirana 40 të tilla dhe 46 ndeshje kanë përfunduar në barazim. 212 gola ka shënuar Partizani, përkundrejt 162 golave të Tiranës. Sfida e fundit është luajtur më 25 shtator 2016, në “Elbasan Arena”, dhe ka përfunduar pa gola, 0-0.
Pra, “peshorja” e ecurisë së viteve të fundit, por edhe e kampionatit të shkuar, anon jo pak nga të kuqtë, që kanë fituar 15 tituj kampioni, ndërsa bardheblutë goxha më tepër, 24 tituj. Barazimi 2-2 është rezultati i fiksuar më shumë në ndeshjet derbi, mes Tiranës dhe Partizanit, plot 29 herë në 46 barazime. Në sfidën e radhës ka jo pak “ish”-ë. Karabeci, Ed.Bakaj dhe Muzaka kanë pasur eksperienca të kuqe, madje kanë dalë nga Akademia e Partizanit. Kalari ka një të kaluar bardheblu, sikurse Asion Daja ishte sezonin e kaluar “dem i kuq”, ndërsa tani ka “kaluar ylberin”, jo për herë të parë.
Kujtojmë se ndeshja e parë mes Tiranës dhe Partizanit është luajtur më 30 mars 1947. “Demat e kuq” fitonin 8-0, duke sigluar kështu edhe fitoren më të thellë deri tani në derbi. Shpagimi bardheblu vjen më 22 shtator 1985, teksa Tirana do t’i kthente reston Partizanit, të cilin e mundi 7-3, në një ndeshje që mbahet mend nga tifozët e të dyja skuadrave për lojën e bukur.
