Transporti i drogës me avionë të vegjël drejt Italisë duket se është rikthyer sërish në Shqipëri. Policia bëri të ditur se avioni me drogë fluturoi nga fshati Akërni i Vlorës në drejtim të Italisë më datën 20 Mars. Janë shoqëruar tre persona si të dyshuar se ngarkuan drogën më avion. Ata janë shtetasit me iniciale N.M., A.M., K.M. Janë sekuestruar një fuoristradë dhe një furgon në pronësi të këtyre shtetasve, të cilat po këqyren nga specialistët e policisë.
“Veprimtaria hetimore është në vijim edhe nga homologët e policisë italiane për zbulimin e autorëve të implikuar në këtë veprimtari kriminale”, thotë Polici e Shtetit.
Sakaq nuk ka asnjë të dhënë mbi sasinë e drogës që u transportua edhe pse tre vetë janë marrë në pyetje. Policia e bëri të ditur këtë informacion vetëm pasi lajmi doli në media.
