Reshjet e dëborës kanë përfshirë sërish juglindjen e vendit dhe kryesisht lartësitë mbi 800 metër edhe pse jemi në ditët e para të muajit Mars që shënon dhe startin e pranverës.
Zona e Dardhës dhe fshati turistik janë sërish nën bardhësi pasi gjatë natës ka rënë rreth 10 cm borë.
ARRSH bën me dije se në terren punohet për pastrim dhe kriposje e kësaj rruge, teksa nuk është shfaqur asnjë problematikë për drejtuesit e mjeteve, të cilët megjithatë këshillohen të jenë të pajisur me mjetet e nevojshme dimërore.
Aksi Korçë-Bonoshticë-Dardhë është i hapur gjithashtu, ndërsa nuk raportohen problematike as në rrugët e tjera nacionale apo rurale.
Dëbora ka mbuluar mëngjesin e të martës edhe disa zona në qarkun e Shkodrës. Sipas të dhënave nga Autoriteti Rrugor Shqiptar, në akset Hani i Hotit-Tamarë, Tamarë-Vermosh dhe Botë-Theth, reshjet kanë qenë të dendura në lartësinë mbi 1300 metra. ARRSH noftoi se është kryer kriposja e rrugëve dhe deri tani nuk raportohet për probleme në qarkullim.
