Janë rikthyer aksionet e OSHEE për lidhjet e paligjshme të energjisë. Sot 9 persona kanë përfunduar në burg, njofton zyrtarisht ky institucion.
Grupet e Task Forces në drejtoritë rajonale Shkodër, Burrel dhe Tiranë janë duke ushtruar kontrolle në lidhje me ligjshmërinë e furnizimit me energji elektrike të subjekteve private dhe familjare.
Në Tiranë, kontrollet jane fokusuar në aksin Vaqarr-Pezë-Ndroq, si dhe Qesarak, Sauk dhe në zonën e Kamzës dhe Laprakës.
Si rezultat i këtij aksioni në te trija rajonet janë shoqëruar në polici 5 shtetas, tre prej tyre biznesmenë (3 në Shkodër, 1 në Mirditë dhe 1 shtetas në Tiranë).
Më herët, në Fier janë shoqëruar në polici 4 abonentë, për vjedhje të energjisë elektrike.
Aksioni vijon në të gjithë vendin ku priten të tjera arrestime, thotë OSHEE.
Aksioni vjen në kulmin e krizës energjetike, ku shumë zona kanë probleme me furnizimin me energji mes tyre edhe Tirana.
