Biznesmeni Rezart Taci duket se është sërish në telashe. Ai deklaroi mbrëmë në emisionin “Opinion” se ka marrë pafajësinë dhe s’ka asnjë problem me drejtësinë shqiptare, por sot televizioni Top Channel raporton se Prokuroria e Tiranës e ka dërguar sërish për gjykim Rezart Taçin për të njëjtat akuza për të cilat Apeli e shpalli të pafajshëm disa muaj më parë.
Në fakt akuza është e njëjta por objekti është i ndryshëm. Kësaj radhe Taçi akuzohet se ka shmangur pagesën e TVSH-së, akcizës dhe taksën e karbonit, gjatë kohës që ka patur nën administrim kompaninë Armo. Sipas prokurorisë, shmangia e këtyre detyrimeve kap një vlerë që shkon mbi 8 milionë euro.
Këtë konstatim fillimisht e ka bërë një audit i tatimeve që kontrolloi veprimtarinë e Armo-s për vitet 2011-2013. Dhe në bazë të këtij raporti prokuroria nisi hetimet dhe e ka dërguar në gjykim, raporton TCH.
Sipas prokurorisë, në një kohë kur Armo nuk shlyente detyrimet tatimore me argumentin se nuk kishte likuiditet, janë regjistruar tërheqje të konsiderueshme disa milionë euro nga llogaritë bankare të firmës, të cilat nuk dihet se ku kanë përfunduar.
Vendimin do ta marrë Gjykata e Tiranës, e cila do të vlerësojë nëse qendrojnë apo jo argumentet e prokurorisë. Ashtu si edhe në procesin e parë, Rezart Taçi po gjykohet në mungesë pasi prej më shumë se dy vitesh është larguar nga vendi.
