Ashtu si përflitej prej ditësh, UEFA ka vendosur të ndryshojë zyrtarisht rregullat për pjesëmarrjen në Ligën e Kampioneve, duke nisur nga viti 2018.
Kështu, duke nisur nga sezoni 2018/19, 4 vendet e renditura më lart në renditjen e UEFA-s do të çojnë direkt në grupe 4 klube. Kjo do të thotë se Anglia, Spanja, Gjermania e Italia, që aktualisht janë në top4, do të çojnë direkt në grupe 4 klube, një lajm i shkëlqyer ky sidomos për Italinë e rrënuar, që me zor po çon dy klube në grupe, duke parë se prej vitesh asnjë klub italian nuk kalon dot turin play-off në Champions.
Gjithashtu, renditja e UEFA-s për klube do të ndryshojë dhe klubet do të marrin pikë në mënyrë individuale, edhe për sukseset në histori. Fituesi i Europa League do të kualifikohet direkt në grupet e Ligës së Kampioneve
Lëvizja e re nga UEFA, që gjithashtu do të shtojë ndjeshëm të ardhurat për klubet, ka pasur për synim kënaqjen e shteteve kryesore, që kërcënonin me krijimin e një Superlige për klube.
