Agjencia britanike e lajmeve vijon që të pasqyrojë rezultatet e zgjedhjeve parlamentare në vendin tonë. Nën titullin “Ajo që prisnim, Partia Socialiste e Shqipërisë kryeson në zgjedhjet parlamentare”, kjo media prestigjioze sjell opinionet e votuesve shqiptare, që shpresojnë tashmë në një integrim më të shpejtë të vendit në familjen evropiane. “Të afrohemi sa më shumë me Evropën. Të kapim standardet që do Evropa”, është shprehur Vilma Gjata, banore.
“Zgjedhjet shkuan normal. Fitoi ajo që pritej, dihej, pritej nga ne. Qeveria ka punuar mirë, ka pas të meta, por kemi ecur shumë përpara”, tha Haxhi Koleci, banor.
“Shpresoj që të dy palët të pranojnë rezultatin sido që të jetë”, tha Ina Zaqo, banore.
“Qeveria e re duhet të jetë vazhdimësi për të ardhmen me korrektësi dhe dinjitet siç ka punuar”, Adil Allaibeu.
Reuters thekson se bazuar në rezultatet e deritanishme të zgjedhjeve Kryeministri Rama duket se është në rrugën e duhur për një mandat të katërt qeverisës, pasi Partia e tij Socialiste kryeson në raport me rivalet e saj politike.
Në analizën e tyre gazetarët e “Reuters” theksojnë se Rama në pushtet që nga viti 2013, ka dëshmuar rritje të shëndetshme ekonomike dhe një imazh kryesisht popullor jashtë vendit.
Përmendet po ashtu misioni që Rama i ka vënë vetes për ta anëtarësuar Shqipërinë në Bashkimin Evropian deri në vitin 2030, një premtim rreth të cilit ai e përqendroi fushatën e tij elektorale.
Agjencia e lajmeve “Reuters” ndalet edhe tek fakti se rreth 200,000 shtetas shqiptarë që jetojnë jashtë vendit votuan të dielën, hera e parë që diaspora mundi të votojë në distancë. Klan News
