TIRANE- Mbremja e së shtunës e ka gjetur vendin të përfshirë nga reshje shiu në zonën perëndimore e qendrore, dhe reshje bore në juglindje dhe verilindje. Sakaq një sërë rrugësh paraqesin veshtirësi në lëvizje.
Nga të dhënat e fundit rezulton se në aksin e juglindjes dhe sidomos në Qafën e Thanës dhe Qafë Plloçë lëvizja e mjeteve bëhet me vështirësi për shkak të intensitetit të reshjeve të dëborës.
Ndërkohë, raportohet që Rruga e Kombit është e kalueshme por duhet bërë kujdes në segmentin Milot-Rrëshen, ku ka pasur shembje dhe në afërsi të tunelit për shkak të reshjeve të borës.
Në aksin Tiranë-Peshkopi, veçanërisht nën zonën e quajtur Pishat dhe Gurët e Skëndërbeut, kërkohet të bëhet kujdes sepse për shkak të temperaturave shumë të ulëta në rrugë ka shtresa akulli. Rruga Peshkopi-Kala e Dodës kalohet me zinxhirë për shkak se trashësia e borës është më e madhe.
