Edhe pse jemi drejt stinës së pranverës, reshjet e dëborës kanë zbardhur sërish majat e maleve në veri të vendit.
Mësohet se në qarkun e Kukësit, në zonat malore gjatë natës ka patur reshje shiu dhe në lartësitë 800 m reshje bore.
Reshjet e borës kanë përfshirë njësitë administrative si Kalisë, Arrën, Surroj, Bushtricë, Gryk-Çajë, Ujmishtë, Topojan, Shishtavec e Borje. Trashësia e borës në këto zona nuk i ka kaluar 10 cm duke mos sjell probleme në qarkullimin e mjeteve apo izolim të fshatrave.
Ndërkohë reshjet e shiut gjatë natës kanë sjell rënie të gurëve në disa segmente rrugore rurale dhe nacionale, si ato Kukës-Bushtricë, Kukës-Çaf Mali apo Kukës-Shishtavec pa shkaktuar bllokim të rrugëve.
Po ashtu edhe në akset e Lotit 1, Hani Hotit-Tamarë, Tamarë-Vermosh & Bogë-Theth gjatë natës ka patur reshje shiu dhe në lartësitë mbi 1200 m reshje bore.
