Reportazhi në burg i Ardit Gjebreas shkaktoi një furtunë të vertetë në shkurt të këtij viti kur u transmetua në programin “E diela shqiptare” në Tv Klan. Rrjetet sociale shpërthyen, analistët shkruan, dhe emisione të tëra u zhvilluan pas kësaj interviste me të dënuarin me burgim të përjetshëm Marjan Rroku. Po kështu edhe familja e viktimave shfaqi indinjatë të thellë. Vetë moderatori Ardit Gjebrea do të deklaronte në atë kohë se qëllimi i reportazhit ishte të tregonte “një ditë në burg” dhe jo të shfajësonte autorin e dënuar nga gjykata.
Ndërsa sot pas 8 muajsh është mbyllur dhe procesi gjyqësor që nisi ndaj moderatorit Gjebrea. Gjykata e Tiranës ka deklaruar të pafajshëm Ardit Gjebrean nga padia për fyerje. Faslli Canaj, babai i adoleshentes Alda Canaj, e cila u vra bashkë me të ëmën e saj në vitin 2001 nga ish-agjenti i SHISH, Marjan Rroku e paditi moderatorin me pretendimin se përmbatja e intervistes ishte fyese për familjarët e viktimave.
Në përfundim të nëntë seancave gjyqësore, në përfundim të shqyrtimit dhe analizimit të provave të paraqitura nga palët në gjyq, një trup gjykues i kryesuar nga gjyqtari Martin Deda, vlerësoi se nga ana e moderatorit nuk ishte konsumuar kundërvajtja penale për të cilën ai akuzohej.
“Deklarimin e pafajshëm të të akuzuarit Ardit Gjebrea, për kundërvajtjen penale të ‘fyerjes së kryer botërisht’, më shumë se një herë”, thuhej në dispozitivin e vendimit të gjykatës, të cilin e citon gazeta “Panorama”.
/Opinion.al
