Nga Fundim Gjepali
Për mua një restorant që nuk vendos në një nivel sallë dhe kuzhinë nuk është një restorant i mirë. Koha e kuzhiniereve një kërkojnë të ndriçojnë vetveten dhe shkelin me këmbë të gjithë kolegët e tij kameriere e sommelier ka mbaruar.
Ndjehem krenar që në “Antico Arco” kemi investuar paralelisht si në sallë dhe në kuzhinë duke pas një staf salle të një niveli shumë të lartë, të cilët janë pjesë e krijimtarisë dhe filozofisë time të kuzhinës.
Ti mund të jesh një kuzhinier shumë i aftë, por nëse nuk ke një kamerier, i cili prezanton dhe shpjegon pjatat e tua klientëve, atëherë mundi i kuzhinës shkon kot. Kamerieri është si kartëvizita e parë, si prezantimi i parë…Ai duhet të mbaj veshur gjithë inteligjencën, shijen dhe elegancën e restorantit apo të vendit ku punon.
Shumë prej jush mund të kenë patur shpesh përplasje me kamerierët. Një pakujdesi në sjellje, zemëron klientin.
Mendoj se nuk bëj aspak keq kur theksoj se kamerieri ka një rol shumë të rëndësishëm! E dini si është kjo punë?! Është sikur do i shprehesh dashurinë një vajze me përkthyes. Domethënë dashuria e kuzhinierit në pjatë dhe vajza në këtë rast është klienti që do konsumojë pjatën tënde.
Dhe ai ka nevojë që, kamerieri të dijë prejardhjen e produkteve dhe filozofinë e përgatitjes se pjatës. Lë të biem dakord që, ashtu si në film, ai është një lloj regjisori në vendin e punës.
Po ju tregoi një histori reale. Më kujtohet një rast i shëmtuar në Tiranë, në një lokal afër liqenit, ku një miku im kishte rezervuar një tavoline për 4 persona, unë dhe një vajzë arritëm të paret në takim, pasi u ulëm në tavolinë po bisedonim dhe prisnim 2 personat e tjerë, papritur kamerieri vjen e na thotë që… kemi dhe dhoma sipër.
U shtangëm. Për ne ishte një darkë pune dhe nuk ishte darkë dashnoresh. Vajza në fjalë, një personazh që punon me menaxhimin e hoteleve në Shqipëri, më thotë: e shikon, ky është niveli profesional, dhe gabimi është se investohet në mënyrë të pakuptimtë në lukse, në sallat e restoranteve dhe 0 lekë në formimin e burimeve njerëzore.
Reagimi i parë që na erdhi në mend dhe vendimi që morëm pothuajse të dy në heshtje ishte: këtu nuk shkelim më. Ky është një problem botëror, jo vetëm në Shqipëri, por atje më ndodhi kjo shëmti. E ndoshta Shqipëria ka nevojë urgjente për një staf të kualifikuar dhe më mirë trajnuar.
Prandaj unë e them që roli i një kamerieri të formuar mirë në një restorant është shumë i rëndësishëm. Edhe punëdhënësit vetë nuk e vlerësojnë punën e kamerierit. Të shumtë janë ata që e konsiderojnë atë si një gjë të thjesht dhe mekanike, madje, nëse punësohesh kamerier merr pas vetes epitet ofenduese!
Kamerier do të thotë zanat dhe është art më vete. Ata (duhet të) kuptojnë nga kuzhina, njohin verërat e pijet alkoolike nga një cep i botës në tjetrin dhe pa e mohuar që, rrogat e bakshishet janë të mira nëse e bën punën e kamerierit me krenari.
Më poshtë po ndajmë me ju disa foto të kameriereve në lokale të ndryshme nëpër botë ku është investuar në sallë që nga fillimet e viteve 900.
Marrë nga www.fundimgjepali.com
