Prodhuesi francez i makinave “Renault”, do të tërheqë më shumë se 15 mijë makina për të bërë disa ndryshime në motorrët e tyre, në mënyrë që të pajtohen me standardet e emetimeve.
Komentet vijnë nga ministrja e Energjisë, Segolene Royal. Ministrja, me përgjegjësi për mjedisin dhe zhvillimin e qëndrueshëm, ka përsëritur se Renault nuk është e vetme në tejkalimin e niveleve të ndotjes, por nuk përmendi marka të tjera. “Renault është angazhuar në tërheqjen e 15 mijë makinave, për t’i kontrolluar dhe ndrequr në mënyrë që sistemi i filtrimit të punojë edhe në temperatura të larta, apo kur është poshtë 17
gradëve, sepse atëherë sistemi i filtrimit nuk funksionon më”, tha Segolene Royal.
Ajo tha se testet duhet të bazohen në kushte reale të udhëtimit me makinë, si do që të jetë temperatura jashtë. “Për t’u treguar e sinqertë me kompaninë, ekzistojnë dhe marka të tjera që i tejkalojnë normat”, tha ministrja. Javën e kaluar, Renault deklaroi se ishte hetuar për teknologjitë e emetimit të gazrave ndotës, lajm që “fshiu” miliarda nga vlera në treg e kompanisë. “Ne po punojmë në një plan teknik në redukimin e emetimit të gazrave ndotës. Renault nuk ka mashtruar. Ne nuk po përdorim ndonjë software apo metoda të tjera”, tha Thierry Koskas, drejtori i shitjeve i kompanisë.
