Renato Milloshi i cili u vetëdorëzua një ditë më parë për ekzekutimin e Elton Çiços në 1 maj të vitit të kaluar në lokal “De Niro” në Bllok ka dhënë versionin e tij në polici.
“Pas ngjarjes jam fshehur në periferi të Tiranës ku kam jetuar në banesa të ndryshme. Me Jani Aliajn nuk kam kontaktuar. Kam dëgjuar që ka ikur jashtë vendit”,- ka rrëfyer Milloshi, raporton tv News 24.
Renato Milloshi djali i Hysni Milloshit, kryetarit të ndjerë të Partisë Komuniste të Shqipërisë, të pas viteve ’90 ishte pronari i makinës tip ‘Ford’ që transportoi Jani Aliajn në vendngjarje. Makina u sekuestrua nga blutë disa dite me vonë në një parking në zonën e ish-Bllokut.
Emri i tij ka qenë i lakuar edhe më herët në dosjet e policisë. Më 30 mars të vitit të kaluar, 37-vjeçari i lindur në Berat është dënuar nga Gjykata e Tiranës për mbajtje pa leje të armëve sportive, si dhe për kanosje të një personi.
Ekzekutimi i Çiços
Çiço u ekzekutua brenda Bar “De Niros” vetëm pak minuta pasi ishte ulur në një tavolinë me dy miqtë e tij, njëri oficer policie, tjetri mjek, dhe në praninë e një gazetari të kronikës.
Sikundër u konstatua edhe nga pamjet filmike të kamerës së sigurisë brenda lokalit, atentatori trup mesatar ishte i mirinformuar për objektivin, duke mos i lënë asnjë mundësi reagimi.
Vetëm 26 ditë më vonë Policia e Shtetit në një dalje publike bëri të ditur emrat e personave të dyshuar si ekzekutues të Çiços. Ndërsa Renato Milloshi u dorëzua dje Jani Aliaj, vijon të jetë në kërkim nga policia.
