Edhe pse tarifat e universiteteve për këtë vit nuk janë publikuar, sepse me ligjin e ri të arsimit të lartë, duhet që Këshilli i Ministrave të përcaktojë tarifën tavan dhe më pas senatet akademike përcaktojnë tarifën e shkollimit, Rektori i Universitetit të Tiranës, Mynyr Koni ka deklaruar se tarifat e shkollimit për këtë vit akademik nuk do të pësojnë asnjë rritje, por do të vijojnë të jenë të njëjta si vitin e shkuar.
Në lidhje me regjistrimet në universitet, rektori i UT ka thënë se renditja e 10 degëve që do të bëjnë maturantët nuk ka rëndësi, pasi ata e kanë në dorë ta zgjedhin vetë se ku dëshirojnë të studiojnë. Universiteti i Tiranës këtë vit akademik do të pranojë 428 studentë më shumë se vitin e shkuar, pasi në total në 6 fakultetet e këtij universiteti do të ulen për herë të parë 5378 studentë. Senati i Universitetit të Tiranës ka përcaktuar se 50% të peshës në formulën e pranimit e ka mesatarja e tri viteve të shkollës së mesme, përfshi edhe mesataren e notave të provimeve të Maturës Shtetërore. Ndërkohë që 50% do e ketë nota mesatare e grup-lëndëve të përcaktuara si prioritare nga fakultetet përkatëse.
Kriteret dhe tarifat
Renditja e 10 programeve të studimit në formularin e aplikimit sipas rektorit të UT, Mynyr Koni, nuk ka rëndësi. Pasi sipas tij, maturanti edhe pse mund të shpallet fitues në 5 apo 10 programe studimi, ai do të zgjedhë vetëm një program, atë që preferon më shumë. Në lidhje me kriteret e pranimit, ai ka sqaruar se Universiteti i Tiranës nuk ka asnjë kriter përjashtues, me përjashtim të kushtit të notës mesatare 6, të përcaktuar me vendim qeverie. “Kriteret e pranimit senati i UT i ka përcaktuar që në muajin janar. 50% të pikëve kandidatët i fitojnë nga nota mesatare e gjimnazit, përfshi dhe provimet e maturës, ndërsa gjysmën tjetër të pikëve i marrin nga nota mesatare e grup-lëndëve të përcaktuara si prioritare nga çdo fakultet”, tha rektori i UT, Koni.
Në lidhje me lëndët preferenciale të një programi studimi, kur rezulton se një kandidati i mungon një lëndë pasi ai mund ta ketë pasur në kurrikulën me zgjedhje dhe nuk e ka zgjedhur, nuk e pengon atë për të garuar, por në vlerësim do t’i mungojë pasha e asaj lënde. “UT nuk ka kritere përjashtuese, maturantit që do t’i mungojë një lëndë preferenciale pasi nuk e ka bërë në gjimnaz, nuk do përjashtohet nga gara, thjesht ai nuk do ketë vlerësim për atë lëndë. Humbet pikët që do fitonte nëse do e kishte atë lëndë”, thekson Koni.
Ndër të tjera, rektori i UT ka theksuar edhe faktin se tarifat e shkollimit nuk do të ndryshojnë, por do të jenë të njëjta me vitin e shkuar. “Tarifat nuk janë publikuar, pasi me ligjin e ri të arsimit të lartë, duhet që Këshilli i Ministrave të përcaktojë tarifën tavan, më pas senatet akademike përcaktojnë tarifën e shkollimit.
Dëshiroj të qetësoj studentët dhe familjet e tyre se tarifa e shkollimit nuk do këtë rritje. Personalisht si drejtues i UT-së mendoj se tarifat tashmë duhet të ishin bërë publike, pasi kandidatët kanë të drejtë të informohen para aplikimit si për kuotat, ashtu edhe për tarifat e studimit”, sqaroi Mynyr Koni, rektori i UT./ Syri.net
