Grupimi i Alibeajt ka ankimuar në Komisionin e Ankimimit dhe të Sanksioneve vendimin e KQZ për plotësimin e dokumentacionit, ku Lulzim Basha autorizonte Enkelejd Alibeajn për zgjedhjet lokale të 2023-it.
Kryekomisioneri Ilirjan Celibashi deklaroi të Enjten se kryetari i ligjshëm i Partisë Demokratike është Lulzim Basha, por se dokumenti i autorizimit nga ana e tij nuk është i plotë, duke lënë afat 48 orë për plotësim të mangësive. Një vendim i tillë nuk u prit mirë nga grupimi i Alibeajt.
Përfaqësuesi ligjor i këtij grupimi Indrit Sefa deklaroi para KQZ-së se nëse komisioneri nuk e regjistron PD-në si subjekt zgjedhor, ata do e ndjekin çështjen në rrugë ligjore. Sefa tha se PD nuk do depozitojë asnjë akt shtesë sepse dokumentacioni është korrekt dhe mbi bazën e të gjitha rregullave.
Ndërkohë, Celibashi theksoi se përgjigjien sa i takon dokumentacionit, do e japë sot në orën 24:00, kur të mbarojë afati i përcaktuar. Sa i takon regjistrimit të PD-së si subjekt zgjedhor në KQZ, kryekomisioneri tha se afati është një ose dy ditë pas përfundimit të 48 orëshit.
Ankimim në KAS kanë dorëzuar dhe dy përfaqësuesit ligjorë të Sali Berishës, të cilët kundërshtojnë vendimin e KQZ për mos regjistrimin e PD-së për zgjedhje./Opinion.al
