Mbi 1600 emigrantë, shumica e tyre nga Siria kanë kërkuar azil në Shqipëri gjatë 5 muajve të parë të këtij viti. Ky numër është dyfish më i lartë se i gjithë viti 2017. Rritjen e numrit të emigrantëve ilegalë nga vendet e treta e konfirmon edhe zv/ministrja e Brendshme Rovena Voda.
“Shqipëria ka një trend në rritje të emigrantëve të paligjshëm. Nga Janari deri në Maj shifra në total është 2 133. Më shumë se gjysma po kërkojnë azil në Shqipëri”, u shpreh ajo.
Zv ministrja thotë se Mali i Zi nuk ka asnjë projekt për të ngritur në gardh në kufirin me Shqipërinë.
“Nuk flitet nga Mali i Zi për ndërtimin e një gardhi, ka qenë një skup i mediave. Pasi vet Mali i Zi madje ka kërkuar ngritjen e një tjetër pike kufitare me Shqipërinë”.
Autoritetet shqiptare pranojnë aktivizimin e trafikantëve që ndihmojnë emigrantët për kalim në vendet e BE. Mes tyre ka edhe efektive të policisë kufitare.
“Në fokus ka qenë edhe goditja e kontrabandistëve që ndihmojë në lehtësimin e kalimit të kufirit të këtyre emigrantëve, ka pasur goditje për taksistët dhe grupet që falsifikonin, madje edhe vet efektivëve të policisë kufitare”.
Krahasuar me vendet e rajonit, Shqipëria ka numrin më të ulët të emigrantëve ilegalë, se Serbia dhe Bosnje-Hercegovina të cilët vijnë kryesisht nga vendet në konflikt.
Emigrantët ilegale janë strehuar në qendrën e pritjes në Kakavijë, në Gërhovë të Gjirokastrës, në Kareç dhe tek ajo e azilkërkuesve në Babrru. Te kjo e fundit nuk ka më vende për pritjen e tyre, tha Voda.
