Ministrja e Shtetit për Marrëdhëniet me Parlamentin, Elis Spiropali ka folur në lidhje me kërkesën e opozitës për zgjedhje të parakohshme. Spiropali është shprehur gjatë një interviste televizive se; “Një shumicë nuk mund të niset nga ultimatumet dhe kushtet e një opozite pa kokë për të vendosur për të ardhmen e qytetarëve”.
Ministrja ka theksuar se zgjedhjet janë në 2021 dhe PD duhet të përgatitët për këtë datë. Spiropali u pyet dhe se pse PS nuk pranon zgjedhje të parakohshme në këtë situatë ku ndodhet vendi, kur këtë e kërkon, PD, vendi nuk po mbyllet mirë ekonomikisht, numri i njerëzve që duan të largohen është shumë i madh, ministrja u përgjigj se çdo Shqipëria ka problematikat e veta, por shumica e ka kontratën me qytetarët dhe nuk varet nga kushtet e Bashës.
“Kur flasim për zgjedhje të parakohshme këtu fillon ilariteti, nëse ata kanë vendosur që kontratën me zgjedhësit ta hedhin poshtë, duke mos marrë pjesë në zgjedhje, nuk mund ta djegim ne kontratën me shqiptarët. Ne kemi dy sezone të rënda ku po punojmë për të përmirësuar jetën e shqiptarëve, zgjedhjet janë për 2021 thirrja jonë është të përgatiten për 2021. Në rast se ne do gjykonim për zgjedhjet duke u nisur nga problematikat mund t’ju rendis unë shumë më shumë problematika se ju. Shqipëria është vënd në zhvillim ka bërë përparim, po ka shumë vend për përmirësim, ndryshe do ishim Suedia. Një shumicë nuk mund të niset nga ultimatumet e kushtet e një opozite pa kokë për të vendosur për të ardhmen e qytetarëve. Kontratën e kemi me ata që na kanë votuar, me shqiptarët, jo me Bashën, nëse Basha mendon se nuk ka asnjë shans tjetër për të qeverisur vetëm braktisjen atëherë problemi është i tij jo yni, ishte kjo arsyeja pse ne hymë në zgjedhjet e 30 qershorit. I kemi bërë thirrje vazhdimisht opozitës së bashkuar të ulemi në tryezë e të diskutojmë për çështjet e përbashkëta. Nuk është kusht i Bashës, është serum që Basha e injekton ne venat e forcës së tij politike për të mbajtur gjallë frymën për zgjedhjet. Ka gati një vit që e pretendon. Basha duhet të gjejë një arsye për të dalë nga kjo mos arsye e opozitës”,-tha Spiropali.
Gjatë intervistës, ministrja ka folur dhe për reformën zgjedhore si dhe për qëndrimin e opozitës ndaj saj. Spiropali është shprehur se; “Nëse PD nuk vjen, do ta kalojmë reformën zgjedhore me opozitën parlamentare”.
Sipas saj, tashmë nuk ka më kohë për të pritur dhe se PD duhet të ulet në tyezë dhe të hartojë një draftë të përbashkët me mazhorancën,
“I kemi pritur me vite të tëra mund të bëjmë tjetër, u deklaruam se nuk do e kalojmë reformën pa patur draftin tyre. Ua kemi lënë në dorë kanë zgjedhur të mos marrin pjesë. Në kushtet aktuale i kemi të nevojshme t’i kalojmë rekomandimet e ODIHR me ta ose pa ta. Nëse e kanë seriozisht të ulen në tryezë, të kemi një draft të përbashkët dhe pastaj të ulemi të diskutojmë. Kanë thënë që do marrin pjesë në tryezë, por kushte nuk mund të vënë, është trakt politik. Nuk kemi kohë për të pritur. Edhe Bundestagu thotë që ne të kalojmë rekomandimet. Nëse nuk vijnë jemi gati ta kalojmë me opozitën parlamentare,”-tha Spiropali./ Opinion.al
