Parlamenti ka miratuar shtyrjen e afatit të Komisionit për Reformën Zgjedhore. Pas diskutimeve në seancën e sotme, shtyrja e afatit u votua me 75 vota pro, ndërsa deputetët e opozitës votuan kundër.
Mësohet se e vetmja deputete e opozitës që ka votuar pro, ka qenë Aurora Mara e LSI-së.
Deputetët e opozitës kanë pretenduar që puna e këtij komisioni ka përfunduar dhe duhet ngritur një komision i ri me deputetët e rinj. “Duhet të kemi parasysh që ata deputetë që ishin këtu, nuk janë më. Ju e keni bërë marrëveshjen me ata dhe jo me këtë opozitë që është përballë jush”, u shpreh sot Rudina Hajdari.
Ditën e djeshme, Damian Gjiknuri i cili është edhe kreu i këtij komisioni, tha se opozita kishte afat deri më 5 maj për t’u bërë pjesë e tryezës, në të kundërt reforma do të miratohet nga mazhoranca dhe deputetët e Partisë Demokratike dhe Lëvizjes Socialiste për Integrim që janë në Parlament./Opinion.al
