Në zgjedhjet vendore do të shkohet me kodin aktual zgjedhor, ndërsa mazhoranca do të presë opozitën deri në maj për të nisur punën për hartimin e kodit të ri zgjedhor për zgjedhjet e vitit 2021.
Këtë e konfirmoi sot kreu i Komisionit të Posaçëm për reformën zgjedhore, Damian Gjiknuri. Ai u shpreh se do të bëhet një amendim për t’i krijuar mundësinë Partisë Demokratike që përmes një vëzhguesi të propozojë ndryshime duke pasur edhe të drejtën e vetos, praktikisht me kompetencat e një bashkëkryetari.
“Pavarësisht se PD është jashtë parlamentit, kanë të njëjtat të drejta”, thekson Gjiknuri.
Vota e emigrantëve dhe çështjet e financimeve të partive politike do diskutohen pas zgjedhjeve vendore. Edhe më herët kryeministri Edi Rama ka lënë një derë të hapur për opozitën për miratimin me konsensus, në të kundërt ndryshimet do të bëhen me opozitën e re pasi reforma zgjedhore është një nga pikat kyçe që Brukseli kërkon për Shqipërinë në çeljen e negociatave./Opinion.al
