Nga aktiviteti i Shkodrës me anëtarësinë e Partisë Demokratike, Lulzim Basha ka folur edhe për reformën zgjedhore, duke i dërguar një mesazh të drejtpërdrejtë Rudina Hajdarit dhe deputetëve të tjerë që kanë hyrë në parlament. Lulzim Basha ka thënë se ai nuk është komisioni i reformës zgjedhore, pasi pikërisht bashkëkryetari i saj, Damian Gjiknuri duhet të ishte në burg për vjedhje votash.
“Për këtë duhet një reformë e vërtetë zgjedhore për të cilën pyeten qytetarët. Kam një mesazh për ata që janë ulur bashkë me Damian Gjiknurin, që duhet të ishte në burg për vjedhje votash, të ulur bashkë me ata që janë kapur në përgjime duke blerë e shitur vota, duke kërcënuar demokratët: Zonja dhe zotërinj, ai nuk është komisioni i reformës zgjedhore. Ai është, në pjesën më të madhe, komisioni i paraburgimit të Damian Gjiknurit me shokë. Asnjë produkt i tyre nuk përbën gjë tjetër veçse një turp. Nuk e njohim, nuk do ta njohim, mos harxhoni kohën kot”, theksoi Basha.
Sot Komisioni për Reformën Zgjedhore zhvilloi takimin e parë, ku ishin të pranishëm deputetët e rinj të opozitës dhe trupa diplomatike. Damian Gjiknuri tha se PD do ta kishte gjithmonë derën e hapur./Opinion.al
