Dy ditë pas publikimit të draftit përfundimtar të Komisionit të Venecias, Kryetari i Komisionit të ligjeve, Fatmir Xhafaj tha se maxhoranca është e gatshme të përmbushë rekomandimet. Një prej tyre është edhe garancia për t’i siguruar opozitës përfaqësim në të gjitha institucionet e drejtësisë.
Fatmir Xhafaj u shfaq i kënaqur nga opinioni përfundimtar i Komisionit të Venecias në lidhje me ndryshimet kushtetuese të reformës në Drejtësi. Zërat që flasin për një rrëzim të punës së ekspertëve të thirrur prej tij, Xhafaj i konsideron naive ndërsa shton se gjithë struktura e organeve kushtetuese të drejtësisë është konfirmuar.
Kur vjen fjala te shumica e cilësuar me të cilën duhen zgjedhur drejtuesit dhe anëtarët e këtyre institucioneve, ai pohon se Venecia ka përcaktuar fushën e lojës brenda së cilës duhet të zhvillohet debati politik mes palëve.
Si kryetar i komisionit të posacëm parlamenar për Reformën në Drejtësi, Xhafaj shpjegon përse e cilëson të logjikshme opinionin e Venecias për të mos ndërprerë mandatin e kryeprokurorit Llalla.
Arsyeja pse për Byronë Kombëtare të Hetimit, Venecia nuk është shprehur është sepse ajo nuk ka qenë pjesë e draftit. Xhafaj tregon çfarë do të ndodhë me draftin e Qeverisë për Byronë, pas miratimit të reformës.
I pyetur nëse i trembet një bojkoti nga opozita të Reformës në Drejtësi, Fatmir Xhafaj shprehu bindjen se demokratët nuk do t’i shmangen kësaj përgjegjësie. /abcnews
