Një ditë pasi Nishani kërkoi takim me palët politike për gjetjen e një zgjidhje për miratimin e reformës në drejtësi, vjen reagimi i të majtëve. Kreu i grupit parlamentar të PS-së, Gramoz Ruçi ka thënë se duhet ta zgjidhin ekspertët ndërsa politika duhet të qendrojë larg.
Ruçi ka dalë kundër idesë së LSI-së dhe Bujar Nishanit për një tryezë të përbashkët politike, duke thënë se një ndërhyrje politike mund të ndodhë vetëm në fund të procesit. “Çdo trazim në këtë moment i politikës, do të politizonte, komprometonte procesin”, tha ai.
“Në fund të gjithë kësaj faze, që do të ecë sipas rekomandimeve të Komisionit të Venecias, të ndërhyjë politika vetëm në rast se do ketë diçka që do të kërkojë diskutim mes palëve”, vijon argumentin kreu i grupit parlamentar të PS-së
Kreu i shtetit Bujar Nishani vuri para përgjegjësisë politikën shqiptare, e cila sipas tij duhet të lë retorikat dhe të ulet sa më parë në një tryezë të përbashkët për të konkretizuar qëndrimet për reformën në drejtësi. Në një takim fillimviti me gazetarët në Pallatin e Brigadave, Presidenti u shpreh se liderët politik duhet të përcaktojnë piketat se ku duhet të kalojë ky, dhe më tej të lihen në dorën e ekspertëve.
