TIRANË- Edhe pas rekomandimeve të Venecias për reformën në drejtësi, duket se palët nuk po gjejnë paqe. Në takimin e parë konsultativ mes partive, Enkelejd Alibeaj, shprehu rezerva mbi reflektimet e hedhura për diskutim.
“U ndodhëm përpara një befasie. Në tryezat e grupit të ekspertëve u hodh një draft i amendamenteve kushtetuese i përgatitur jashtë këtij grupi ekspertësh, siç duket replikuar edhe njëherë historia proceduriale e mëparshme ku një grup ekspertësh përgatisin draft amendamente sipas optikës së tyre që në këtë rast nuk është optika e të gjithëve, nuk është gjithëpërfshirëse dhe kjo është arsyeja kryesore që zgjati dy orë”, tha Alibeaj mbrëmjen e djeshme.
“Por, ajo që është më e rëndësishme është pikërisht kjo gjë, në fakt nuk është se i shërben një lloj sinqeriteti, një lloj konsensusi teknik mes teknikësh apo po të doni një lloj konsensusi politik që produkti nga ky moment e tutje, konvertimi i të gjitha rekomandimeve të Komisioni të Venecias të bëhet nga të gjithë ekspertët, të majtë dhe të djathtë. Kjo ishte befasia më e madhe që realisht nuk e prisnim. Është ajo çfarë kishim kërkuar gjithmonë, barazi mes palëve dhe tjetra, që brumi mbi të cilin të përpunohet draft amandamentet kushtetuese të jetë ky, dokumenti i Komisionit të Venecias nga paragrafi i parë deri tek paragrafi i fundit të merret në analizë të imtësishme nga të gjithë ne”, deklaroi Alibeaj.
Pak ditë më parë, në opinionin e Komisionit të Venecias u rekomandua mes të tjerash, se disa ndryshime kushtetuese duhet të thjeshtohen e të qartësohen. Më datë 4 janar 2016 tryeza konsultative do të mblidhet sërish.
