TIRANË- Në përfundim të takimit me Kryeministrin Rama tek vila qeveritare, Ilir Meta i është përgjigjur interesit të medias, duke sqaruar se u fol për reformën në drejtësi dhe me këtë rast kishte dhe një thirrje për opozitën:
“Ekspertet e PD kanë bërë punë të lavdërueshme deri tani. Na vjen keq dhe gjej rastin t’u bëj thirrje të rikthehen në tryezë. Të mos vetë- përjashtohen për një çështje apo disa cështje të caktuara. Të ruajmë këtë frymë bashkëpunimi dhe në fund do të shkohet drejt komisionit të posaçëm parlamentar për këtë reformë”, tha Meta.
Kërkesa e Nishanit për tryezë politike a do të pranohet?
Meta: Jemi në nivelin kur grupi i ekspertëve shqiptarë e ndërkombëtarë duhet të përfundojnë draftin sipas rekomandimeve të Venecias. Nuk i largohemi as tryezës politike por konsensusi arrihet duke u ulur dhe jo duke u larguar nga tryeza.
Takimi vjen një ditë pasi kryeparlamentari Meta u takua me ambasadorin e Shteteve të Bashkuara të Amerikës, Donald Lu. Ata diskutuan për rreth 3 orë mbi çështjen më “të nxehtë” të momentit, reformën në drejtësi, për të cilën me siguri, kreu i diplomacisë amerikane e ka dhënë mesazhin e tij.
Ndërsa në takim e sotëm bashkë me Ramën e Metën ishin të pranishëm edhe krerët e grupeve parlamentare Gramoz Ruçi dhe Petrit Vasili, si dhe kreu i Komisionit të posaçëm për reformën në drejtësi, Fatmir Xhafaj. I pranishëm në takim është gjithashtu edhe vetë ministri i Drejtësisë, Ylli Manjani.
Të gjitha këto lëvizje erdhën menjëherë pasi ekspertët e mazhorancës dhe opozitës nuk ranë dakord me mënyrën sesi po diskutohet drafti i reformës.
