Deputetja e PS-së, Vasilika Hysi ndërsa fliste për miratimin me konsensus të reformës në drejtësi nga Pallati i Brigadave, shpeshherë është ndërprerë me humor nga kryeministri Rama.
Në fjalën e saj, ndër të tjera, Hysi vlerësoi rolin e ekspertëve të OPDAT dhe EURALIUS për reformën në drejtësi, por pikërisht në këtë moment, ka ndërhyrë kryeministri Rama duke thënë se; kur vinte Vasilika në mbledhje grupi e lodhur e më thoshte më kanë mbajtur pa gjumë Jon (Jon Smibert) dhe Rainer (Rainer Deville), doja me i thënë të paskan shkatërru fare.
Ndërsa, pas batutës pa kripë të kryeministrit, në sfond dëgjohen disa të qeshura, me shumë siguri, nga nënkuptimi frojdist i kryeministrit shqiptar.
Kurse Vasilika, në atë moment, nuk i mbeti asgjë tjetër përveçse të buzëqeshë.
Megjithatë, ajo theksoi, duke ndjekur disi lojën e kryeministrit, sigurisht me një buzëqeshje të ngrirë në cepat e buzëve, se kemi përfituar shumë nga këmbëngulja e Jon dhe qetësia e Rainer.
