Edi Rama u ka kërkuar ditwn e djeshme koordinatorëve të rajoneve sqarimin e anëtarësisë për rëndësinë e referendumit të 9 prillit.
Në një takim të zhvilluar dje pasdite në selinë e PS-së, kryesocialisti ka kërkuar që të përfundojë sa më shpejt edhe zgjedhja e kryetarëve të PS-së në 61 bashkitë e vendit, pas përfundimit të kongresit dhe konstituimit të asambleve të bashkive.
Ndërkohë koordinatorët e rajoneve po ngrenë në të gjitha bashkitë e vendit komisionet e votimit, që do të menaxhojnë të gjithë procesin e votimit për referendumin nga anëtarësia e Partisë Socialiste më 9 prill.
Por për të sqaruar anëtarësinë, nuk janë angazhuar vetëm koordinatorët, por edhe deputetët, të cilët janë në kontakte të vazhdueshme me zonat e tyre, edhe për shkak të shtimit të anëtarësisë së kësaj partie.
Në këtë fushatë janë edhe deputetët që mbrojnë idenë që Rama duhej rikonfirmuar si kryetar, edhe pse pa bërë zgjedhjet siç përcaktonte statuti, por që kanë kundështuar hapur idenë e mbajtjes së referendumit.
Edhe ata do të duhet t’i shpjegojnë bazës socialiste përse duhet mbajtur referendumi dhe si duhet t’i përgjigjen pyetjes: “Kur Partia Socialiste është në qeveri dhe kryetari i saj është Kryeministër, a konsiderohet i rinovuar automatikisht mandati i kryetarit?”.
Kjo është pyetja që anëtarësia e Partisë Socialiste duhet t’i përgjigjet me një “Po” ose “Jo”. Statuti i PS-së, me të cilin PS ka funksionuar deri më 19 mars 2016, përcaktonte që zgjedhjet për kryetarin bëheshin një herë në katër vjet, pavarësisht nëse partia ishte në pushtet apo nëse kryetari ishte Kryeministër.
Nuk dihet nëse po zhvillohet fushatë nga ajo pjesë e anëtarëve të Asamblesë Kombëtare, të cilët ishin kundër referendumit dhe kërkonin që zgjedhjet për kryetarin të bëheshin nga anëtarësia përmes parimit një anëtar- një votë.
Një javë më parë, në mbledhjen e Grupit Parlamentar socialist, pyetjes së Ben Blushit “nëse do të ketë fushatë për të debatuar për dy mundësitë e përgjigjes që duhet të japin socialistët për këtë referendum?”, kreu i Grupit, Gramoz Ruçi, iu përgjigj: “Për aq kohë sa anëtarësia është thirrur të japë një mendim në referendum, PS-ja nuk ka përse bën fushatë. Por kush të dojë, të ndërmarrë një fushatë, është i lirë ta bëjë”./Panorama.al
