Ministria e Punëve të Brendshme ka sqaruar zyrtarisht pretendimin e ngritur nga biznesmeni Altin Bamllari, pronari Piceri “Era” në Tiranë, se është dhunuar nga polica së bashku me djalin e tij.
Përmes një njoftimi zyrtar sqarohet se 30 minuta pas mesnate në bulevardin “bajram Curri”, Bamllari ka qenë duke udhëtuar me djalin e tij 22-vjeçar në makinën me targa TR3884 U dhe nuk i janë bindur shërbimeve të Komisariatit të Policisë Rrugore për të çuar mjetin në pikën e bllokimit.
Ndaj tyre sqaron Ministria – ka filluar procedimi penal për “Mosbindje të punonjësve të policisë”.
Sipas njoftimi, ata kanë pasur pa shlyer një masë administrative prej afro 1 viti, në vlerën 15.000 L (të reja) për mungesë siguracioni dhe sipas Kodit Rrugor automjeti duhet të bllokohet në pikë bllokimi deri në përfundim të procedurave.
Pas kundërshtimit të urdhrit për shoqërim të dhënë nga punonjësit e policisë, ministria e Brendshme thotë se ata kanë braktisur makinën përballë ambasadës ruse dhe janë larguar me vrap në drejtim të Piramidës.
“Gjatë ndjekjes nga forcat e policisë, shtetasi A.B. është rrëzuar dhe ka pësuar dëmtime të lehta. Policia ka bërë të mundur kapjen e tyre afër Piramidës dhe i ka shoqëruar për veprime të mëtejshme. Në përfundim të veprimeve, këta shtetas janë proceduar penalisht për “Mosbindje të urdhrit të punonjësit të policisë”, parashikuar nga neni 242 i K.Penal”, thuhet në njoftim.
Në përfundim, thuhet se Shërbimi i Çështjeve të Brendshme dhe Ankesave vijon me verifikimin e veprimeve të punonjësve të policisë, në përfundim të të cilit do të marrë masat përkatëse.
“Policia e Shtetit është e angazhuar t’i shërbejë publikut, duke kërkuar kontributin dhe bashkëpunimin e çdo qytetari për të respektuar ligjin dhe rregullat”, – përfundon njoftimi zyrtar.
