Ndërkohë që vazhdojnë kërkimet për gjurmët e Emiliano Salasë, futbollistit të zhdukur mbrëmjen e së hënës, ka reaguar me akuza të forta ish- e dashura e tij, Berenice Schkair .
“E pabesueshme që ndërprenë kërkimet pikërisht në momentin që u gjendën të dhënat e para. Hetoni mbi mafien e futbollit sepse nuk besoj se është një aksident. Nuk mund ta heq mendjen nga ty, Emi. Jeta ndryshon brenda pak sekondash, jemi thjesht pluhur në Univers. ”- shkruan ajo në Twitter .
28-vjeçari humbi gjurmët teksa ishte rrugës për të takuar kolegët e tij të rinj të Cardiff City. Lidhjet mes radarit dhe avionit tip “Piper Malibu” ku gjendej futbollisti u ndërprenë të hënën në mbrëmje, rreth orës 20:30. Aeroplani fluturonte mbi Kanalin Anglez pranë farit të Casquets. Në bordin e Piper Malibu dyshohet se ishte vetëm sulmuesi 28-vjeçar dhe piloti.
Policia e Guernseyt gjeti disa objekte që lundronin mbi ujë, mirëpo nuk ka arritur të konfirmojë nëse kanë qenë nga ai aeroplan. Ndërkohë, ekipet e kërkim-shpëtimit mbrëmjen e së martës pezulluan kërkimet për shkak të kushteve të motit, për ti rifilluar sot në mëngjes./E.M
