Federata Shqiptare e Futbollit, të premten, ka reaguar pas lajmit të publikuar në media, ku Gjykata e Tiranës, konstatoi zgjedhjet për kreun e FSHF-së, duke mos regjistruar vendimet e Asamblesë së 7 shkurtit.
Përmes një njoftimi për mediat, FSHF, sqaron se nga Gjykata e Tiranës nuk ka një vendim refuzimi apo konstatimi të paligjshmërisë së zgjedhjeve të fundit të organeve drejtuese të FSHF-së.
“Ky vendim ka të bëjë vetëm me kthimin e kërkesës, për shkak të plotësimit të disa dokumenteve shtesë që ka kërkuar gjykata. Pasi të plotësohet dokumentacioni i kërkuar FSHF do ti ridrejtohet gjykatës për depozitimin e dokumenteve që parashikon Ligji”,- citohet nga njoftimi për mediat.
FSHF, bën me dije, se kjo praktikë në Gjykatë ka të bëjë vetëm me regjistrimin e akteve. Sipas saj, legjislacioni në fuqi kërkon që këto akte të regjistrohen në Gjykatën e Tiranës, dhe nga ana e saj, gjyqtarja e çështjes ka kërkuar vetëm disa plotësime në dokumentacionin e kërkuar, të cilat shumë shpejt do ti vihen në dispozicion.
